ميّت قديم

ميّت قديم

آخر قصيدة وبعدها

هاكفر بإنّ العدل موجود في الحياة

وإنّ الرضا والصبر مفتاح النجاه

هاكفر بقول الشعر وكتابته وسماعه

الشعر عمره ما كان دفا

يحميني من برد الجيوب

ولا نسمه تمنع عنّنا صهد السؤال

الشعر في زمن الباحة مالوش مجال

ولا يشتريش قرصين ناموس

بيزنّ فوق أمّ النافوخ ما اعرفش انام

آخر قصيدة وبعدها

هاقتل هابيل جوّايا

وادخل دين قابيل

هوّ اللّي عاش

ووجودنا كان أكبر دليل

واشهد بإنّ المنفعة هيّ الهدف

ما يهمّنيش شكل السبيل

الكذب فيه هيكون صلاتي

والزكاة هتكون نفاق

ومافيش صيام عن أيّ شيء

غي إنّي ارجّع حق لفقير أو مُهان

أو إنّي أنصف حد وادّيله الأمان

وهحج عند المصلحة في دين الفلوس

وان كان لابد أكون رؤوف

واضحك في وشّك واحضنك

ف دا بسّ علشان لمّا اشوف

إزّاي هخونك واطعنك واكسب كمان

آخر قصيدة وبعدها

يمكن أموت

ما أنا أصلي من غير الكلام ميّت قديم

وان مُت فعلاً بعدها ماتعيّطوش

ولا تكتبوش على قبري غير سطرين كلام

"كان هنا إنسان

بيعافر لاجل ما يفضل صح

وبيغلط زيّ البني أدمين"

خلّيكو فاكرين

#شاكرالمغربي

8/5/2023